《單車一週年》
原來眨下眼咁就過左一年。
【歷史回顧】就係上年的今日 - 2017年5月21日，我開展左人生的第一場單車旅行（我短途試過踩上水到沙田又或者大埔到大尾督，長途就係一啲經驗都無😅），今次就決定一黎就挑戰踩過亞-歐界線，抱住零經驗裸踩邊踩邊學邊訓練的心態打大佬。
好記得第一日一出到琛圳，嘩D真係灰到喊左出黎：
1）6-7條行車線並排，我傻更更咁踩左係中線，俾後面既車「嗶～」到應一應
2）一條線上高架、一條直去、一條轉右...我望住個導航完全迷失，連上邊條線都唔知（當時我的馬路踩車經驗應該一隻手數得哂😅）
3）不斷睇錯牌繞錯路，錯左就推車上行人天橋落返對面行車線，點知繞左一大個圈後又會去返原點既？！如是者重覆左呢個結界三次...
4）第一日踩已經落狗屎大雨...
本身諗住第一日踩100公里到東莞，以為係易過食生菜，點知轉轉折折下第一日只係踩得60公里，見到個叫「松崗」好似住得的地方就提早下塌左。洗完衫食完飯折騰完一番後就攤係床上低聲咁吶喊左句：「好掛住香港啊～」
———
當然，係而家呢一刻回望，呢一切一切其實都只係小事一椿，踩到去歐洲亦唔算得上係一個咩既創舉。
人要向前望，人要不斷努力超越自己求變求創新嘛，係未？希望再一年之後的今日，再回望今日的自己，仍然係為自己而感到自豪。
Btw，如果你有睇到最黎呢句，想講句多謝☺️呢個Page由當日旅程開始時的100人到而家4800人，或多或少都多人留意左，多謝多謝！🤓
————————————————
IG:
https://www.instagram.com/dan.kc
YouTube:
https://www.youtube.com/channel/UCgjAZ0PHHvQS-SJ51AGnKng
Search